ViuTV剧集《玛嘉烈与大卫系列：绿豆》，自开播以嚟被唔少网民追捧。虽然剧集已经大结局，但一直是非不断。继早前有传廖碧儿喺片场扮大牌后，日前又爆出两位导演同监製兼编剧「南方舞厅」不和。据闻两位导演过于偏袒周家怡，为咗令佢个角色冇咁乞人憎，任由周家怡改剧本，甚至最后一场重头戏都改咗对白，严重偏离原本角色设定，令「南方舞厅」嬲爆，最终将有关镜头删走。

周家怡话改剧本只係想令角色更人性化。

对此，周家怡接受採访时话自己剧中嘅角色同预计有偏差，佢话：「最初开会时，我都唔知自己嘅角色係咁水性阳花，好担心大家唔锺意，因为我最初只得四集剧本。」对于有传导演畀自己任改对白？周家怡解释：「其实我冇乜点改过剧本，只係最后一场，我只係想令角色更人性化。」问佢有冇同廖碧儿争戏不和？周家怡否认：「梗係冇啦！一套剧好睇唔係一个人，全部角色都要发挥效用。」

周家怡否认同廖碧儿争戏分，话剧集成功係所有人嘅功劳。