薛凯琪（Fiona）忙完同麦浚龙合唱嘅新歌〈结〉嘅宣传活动后，即时飞去越南拍摄黄真真导演新戏《闺蜜2》。新戏除咗Fiona同台湾女星陈意涵等原班人马外，仲加入另一台湾气质女星张钧甯，其实三人一早已经认识，所以开工第一日已火速打成一片。今集故事讲到陈意涵就嚟结婚，几个好姊妹一齐飞去越南展开婚前神秘刺激嘅单身之旅，但其间却闯出大祸，製造唔少笑料。

忙完同麦浚龙合唱嘅新歌后，薛凯琪火速飞去越南拍摄新戏。

日前，三位女主角穿上越南传统服饰出席开镜仪式，Fiona话：「好锺意自己嘅越南妹造型，开工已经一个礼拜，几乎每日都要拍通顶。虽然好攰，但我同陈意涵、张钧甯一早就识，所以开工我哋会不停倾偈、好似一班八婆仔咁，每日开工都好开心。」除咗拍戏开心，越南嘅美食亦令Fiona非常满足，佢话：「呢度啲法包、河粉，全部都好Yummy！我真係要好好控制自己，否则后果不堪设想。」

除咗薛凯琪同陈意涵之外，今次仲加入张钧甯（中）一齐演出。