《狂野时速》系列男星云迪素（Vin Diesel），主演嘅荷里活电影《3X反恐暴族：重火回归》，将于明年年初正式上映。除咗旧拍档森姆积逊（Samuel L. Jackson）助阵演出外，今次仲加入唔少华人面孔，包括韩国男团EXO前中国籍成员吴亦凡，同埋「宇宙最强」甄子丹，而泰国拳霸Tony Jaa亦有份演出，扮演甄子丹同党，云迪素好有可能喺戏中向两人挑机。

甄子丹（左）同云迪素因合作新戏变得非常老友。

云迪素喺新戏中饰演嘅Xander Cage，外号叫「TripleX」，被美国国安局睇中佢健硕兼灵活嘅身手，失惊无神由X Game爱好者变为特工。噚日，电影公司公开首条预告片，一开始森姆积逊喺一间中式酒楼食点心，之后甄子丹凌空跳起以一敌十。而最多镜头嘅当然係云迪素，佢先从高空跳下，再以滑雪工具着陆及滑行，之后再以大大只飞毛腿扫低敌人，埋身肉搏嘅动作场面令人应接不暇。

大只佬云迪素今集再次上天下海，挑战特工极限。