张家辉同老婆关咏荷係圈中公认嘅模範夫妻，两人一向非常低调。日前，家辉被拍到同老婆及女儿Brittany一家三口行街Shopping。虽然贵为影帝，但家辉仍十分悭家，佢行完名店就转攻平民时装店，最后拣咗件199元嘅平价衫。家辉拣完衫排队準备畀钱时，关咏荷同Brittany就现身会合，Brittany双手搭住家辉膊头，两父女一路有讲有笑，感情十分要好。

张家辉行完名店就转攻平民时装店，十分悭家。

现年已经十岁嘅Brittany愈大愈似妈妈，佢扎扎跳同爸爸玩完后，就行去搵妈妈拣衫。扫完货后，家辉主动做「阿四」手拎战利品，带住老婆同女儿行去车库。不过，Brittany发现有记者，所以即时用外套嘅帽笠住自己，之后黐实关咏荷，仲频频偷望兼偷笑，十分可爱。而家辉就十分亲民同记者挥手打招呼，之后就上车打道回府。

张家辉同关咏荷结婚十几年，两人係圈中公认嘅模範夫妻。