噚日，美国电视界盛事「第68届艾美奖颁奖礼」喺洛杉矶盛大举行，大热美剧《权力游戏》横扫五个奖项成为大赢家，更创下「艾美奖」纪录。美国名嘴Jimmy Kimmel 为颁奖礼担任司仪，串尽代表共和党竞逐美国总统嘅房地产大亨特朗普（DonaldTrump）及荷里活白化风波。为咗照顾现场嘉宾，Jimmy仲即场大派妈妈精心準备嘅爱心三文治，非常贴心。

《权力游戏》横扫五个奖项，成为颁奖礼最大赢家。

全晚最搞笑嘅係有份入围最佳综艺节目嘅Jimmy，最后都係失落奖座，呢个时候影星麦迪文（Matt Damon）突然咬住个苹果行出嚟踩场，佢话好遗憾错过咗上一个精彩嘅环节，密密重提Jimmy失奖一事，佢仲搞鬼话：「Jimmy真係好惨，输咗仲要行出嚟做司仪，喺大家面前企足成晚！」其后，麦迪文又呼吁全场一齐畀啲掌声Jimmy， 鼓励呢位「大输家」，场面搞笑。

麦迪文咬住个苹果行出嚟踩场，揶揄Jimmy冇奖攞。