荷里活影星保罗获加（Paul Walker）嘅遗作《狂野时速7》，去年上映叫好叫座，全球票房大收逾澳门币120亿，坐稳全球影史票房排行榜第六位。至于云狄素（Vin Diesel）同狄维庄逊（Dwayne Johnson）拍摄嘅续集《狂野时速8》，将于明年4月上映。日前，电影公司公开首条预告片，大量飞车镜头同打斗场面惊心动魄，令一班影迷睇得劲过瘾。

新加入嘅查理丝泰朗饰演大反派，同云狄素有唔少感情戏分。

虽然《狂野时速8》冇保罗获加嘅镜头，但仍有大批粉丝捧场，预告片公开未够24小时，点击率已超过1.39亿，打破英国女星爱玛屈臣（Emma Watson）主演嘅真人版《美女与野兽》预告片创下嘅纪录，成为单日最高点击率嘅电影预告，气势强劲。此外，预告片仲喺多个社交网站搞直播，单係Facebook直播就有超过400万名粉丝实时观看。

云狄素同狄维庄逊曾经闹不和，但好彩冇耽误电影上映。