刘德华（华仔）主演兼监製嘅新戏《拆弹专家》，将于本月20日正式上映。噚日，电影公司曝光幕后特辑，拍戏出名唔锡身嘅华仔，同姜武、姜皓文拍摄肉搏镜头时，唔小心畀汽车碎片割伤手。不过，因为唔想耽误拍摄进度，华仔贴咗张胶布就继续拍摄另一场同僱佣兵对打嘅戏。继续亲身上阵嘅华仔，被僱佣兵从后箍颈加连环推撞，最后仲被对方大大力踩住背脊。

刘德华拍摄肉搏镜头时，几次唔小心整亲手。

事后，华仔搵饰演僱佣兵嘅外籍演员「算帐」，佢搞笑话：「夜晚拍完返屋企沖凉时，发现背后有一个鞋印。」讲完之后，华仔就企喺外籍演员隔离，好鬼马咁跳高，话要跳得高过对方个头。随后，华仔又话好开心同内地好戏之人姜武合作，佢话：「一直有睇佢嘅作品，係深沉嘅演绎方法，但后嚟发现佢原来有喜剧一面，佢今次演出好有层次，对我嚟讲确係有啲压力。」