现年37岁嘅台湾女星安以轩，今年3月同澳门富商陈荣炼注册结婚。噚日，两人喺夏威夷举行婚礼，女星陈乔恩、刘品言、白歆惠及夏于乔等好友担任嘅姊妹，一见到兄弟团即时伸手要大利是，仲搞笑检查够唔够厚。至于婚礼就喺一望无际嘅蓝色大海边举行，主题为「深海之弦」，约200名观礼嘉宾坐喺以剧场方式摆设嘅凳上，甚有希腊童话浪漫气氛。安以轩挽住老公只手，步入会场时已流露幸福泪光。

安以轩同澳门富商喺夏威夷举行婚礼。

安以轩喺婚礼上着嘅白色婚纱礼服，由法国Stephane Rolland设计师度身订造，手上十卡钻戒亦非常抢镜。新郎含情脉脉亲吻新娘额头后，两人开始宣读誓言，当陈荣炼讲完誓词后，企喺身旁嘅安以轩即时忍唔住爆喊，佢话：「遇到你是我这辈子最大的幸福，老天爷安排在这个时间点，我觉得不容易，我会永远爱你。」紧接係新娘掟花球环节，众姊妹一拥而上，结果由好友陈乔恩接下。

新娘掟花球环节，好友陈乔恩（左）如愿接到花球。