蔡卓妍（阿Sa）主演嘅新戏《原谅他77次》， 上映短短六日，已超过590万票房，成为华语片冠军， 单日票房就屈居亚军，输畀由汤告鲁斯主演嘅《盗墓迷城》，成绩认真唔错。日前，阿Sa同卫诗雅前往戏院谢票，听到新戏嘅好票房，佢兴奋话：「好开心呀，嚟紧我哋会有庆功宴，其实压力真係有啲大，第一次打电话畀老闆叫投资，唔衰得嘛，套戏唔蚀呢，已经好开心。」

蔡卓妍新戏上映六日录得590万票房，成为华语片冠军。

讲到有信心打破《雏妓》1,700万票房纪录？阿Sa话：「最好可以过千万啦，暑假档期好多西片上，通常都係西片天下，港产片有呢个成绩已经好开心，有交代喇，又卖咗片去马来西亚同内地。」问到有冇信心再问鼎影后？佢坦言：「呢套唔係《雏妓》嗰类戏，上映后都有睇网上评论，都几两极，女仔觉得有共鸣，但有啲人就觉得女主角好烦，乜都嘈一餐，我都觉得自己喺戏入面係反面教材。」

新戏取得好成绩，蔡卓妍同卫诗雅前往戏院谢票。