唔少体坛名人退休之后都会寻找新嘅人生道路，对于旧年收山嘅「不败拳王」美韦达嚟讲，退休生活除咗只有「食玩瞓」三个字之外，当然唔少得嘅就係「炫富」！飞机、跑车、钻石同银纸样样都晒，搞到网友个个劲「葡萄」！

或者美韦达人生的一大乐趣，就係「炫富」。（互联网图片）

美韦达众多「玩具」之一。（互联网图片）

去年9月同「菲律宾拳王」帕奎奥打完世纪之战后，美韦达拎住一大笔筹金收山去。唔再係拳手，美韦达乐得清闲，如何打发时间好？当然就係请一大班美女坐佢架私人飞机游山玩水去！

讲到呢架私人飞机就唔讲得笑，美韦达豪掷3,000万英镑买返嚟，都唔知係一般打工仔几多世人工。未知係咪惊人唔知架飞机係属于佢嘅关係，美韦达更特别用上自己个名为架机命名，仲频频放相上社交网站同大家一齐开心Share。

私人飞机再配上一大棚靓女，美韦达退休生活真写意。（互联网图片）

皮带扣及手机壳也镶钻，很想要吧？（互联网图片）

除飞机之外，美韦达嘅名车同钻石亦经常会喺其社交网站中「亮相」，闪耀程度令人为之侧目！当然，最叫网友咬牙切齿都係佢老哥爱晒银纸，闲闲哋都几十叠100蚊美金摆出嚟！仲寸到搵银纸当床铺瞓上去，服未！

早排有消息话，美韦达可能会复出，佢亦承认曾获得多个邀请；不过，佢都依然一一拒绝，原因係佢相当满意家阵嘅无忧生活。拳迷要再次见到美韦达喺擂台上嘅风采？相信都要等到佢洗到乾塘至有机会咯！